Հոդված 1. Օրենքի կարգավորման առարկան

Սույն օրենքը կարգավորում է Հայաստանի Հանրապետության պետական կառավարման, տեղական ինքնակառավարման մարմինների, կազմակերպությունների, քաղաքացիների հարաբերությունները հրդեհային անվտանգության ապահովման բնագավառում:

Հոդված 2. Օրենքի նպատակները

Սույն օրենքի նպատակներն են`
ա) հրդեհային անվտանգության ապահովման բնագավառում պետական քաղաքականության մշակման եւ իրականացման հիմնական ուղղությունների սահմանումը.
բ) հրդեհային անվտանգության ապահովման բնագավառում կարգավորման սկզբունքների եւ դրանց իրականացման մեխանիզմների սահմանումը.
գ) Հայաստանի Հանրապետության բնակչությանը որակյալ եւ հուսալի հրդեհային պահպանությամբ ապահովումը:

Հոդված 3. Հիմնական հասկացությունները

Սույն օրենքում օգտագործվում են հետեւյալ հիմնական հասկացությունները`

հրդեհային անվտանգություն` հրդեհներից անձի, գույքի, հասարակության եւ պետության պաշտպանվածություն.
հրդեհ՝ չվերահսկվող վայրում, որը բարոյական, ֆիզիկական, գույքային վնաս է հասցնում անձի, հասարակության եւ պետության շահերին, վտանգում է մարդու առողջությունը եւ կյանքը.

հրդեհային անվտանգության պահանջներ՝ Հայաստանի Հանրապետության օրենքներով եւ այլ իրավական ակտերով սահմանված` հրդեհային անվտանգության ապահովման ուղղությամբ սոցիալական եւ տեխնիկական բնույթի հատուկ պայմաններ.

հրդեհաշիջման (հրդեհի մարման) հետ կապված վթարային-փրկարարական աշխատանքներ՝ հրդեհի ժամանակ մարդկանց, գույքը փրկելու, տուժողներին առաջին բժշկական օգնություն ցույց տալու ուղղությամբ հրդեհային պահպանության մարտական գործողություններ.

հրդեհային պահպանություն՝ հրդեհների կանխարգելման, հրդեհաշիջման, ինչպես նաեւ դրանց հետ կապված վթարային-փրկարարական աշխատանքներ անցկացնելու նպատակով սահմանված կարգով ստեղծված պետական կառավարման եւ տեղական ինքնակառավարման մարմինների, կազմակերպությունների ուժերի եւ միջոցների, այդ թվում` հակահրդեհային միջոցների ամբողջություն.

հրդեհային անվտանգության միջոցներ՝ հրդեհային անվտանգության ապահովմանը, այդ թվում` հրդեհային անվտանգության նորմատիվ փաստաթղթերի պահանջների կատարմանն ուղղված գործողություններ.

հրդեհատեխնիկական արտադրանք՝ հրդեհային անվտանգության ապահովման համար նախատեսված հատուկ տեխնիկական, գիտատեխնիկական եւ մտավոր արտադրանք, այդ թվում` հրդեհային տեխնիկա եւ սարքավորում, հրդեհային հանդերձանք, կրակմարիչ, հրապահպան եւ հրակայուն նյութեր, հատուկ կապի եւ կառավարման միջոցներ, համակարգչային ծրագրեր, տեղեկությունների բանկ, ինչպես նաեւ իրավական, հրդեհների կանխարգելման եւ հրդեհաշիջման այլ միջոցներ.

հրդեհային անվտանգության ապահովման համակարգ՝ հրդեհների դեմ պայքարի համար նախատեսված ուժերի եւ միջոցների, ինչպես նաեւ իրավական, կազմակերպական, տնտեսական, սոցիալական եւ գիտատեխնիկական միջոցառումների ամբողջություն:

Հոդված 4. Հայաստանի Հանրապետությունում հրդեհային անվտանգության ապահովումը

Բնակչության, բնակավայրերի եւ օբյեկտների հրդեհային անվտանգությունն ապահովվում է՝
ա) պետական կառավարման եւ տեղական ինքնակառավարման մարմինների, կազմակերպությունների, պաշտոնատար անձանց եւ քաղաքացիների կողմից Հայաստանի Հանրապետության օրենսդրությամբ սահմանված, ինչպես նաեւ նորմատիվ փաստաթղթերով նախատեսված հրդեհային անվտանգության պահանջների պարտադիր կատարմանբ.
բ) հրդեհների առաջացումը կանխարգելող եւ դրանց մարմանը նպաստող համապետական եւ տեղական նպատակային ծրագրերի մշակմամբ ու իրագործմամբ:

Հոդված 5. Հրդեհային անվտանգության մասին Հայաստանի Հանրապետության օրենսդրությունը

Հրդեհային անվտանգության մասին Հայաստանի Հանրապետության օրենսդրությունը բաղկացած է Հայաստանի Հանրապետության Սահմանադրությունից, Հայաստանի Հանրապետության միջազգային պայմանագրերից, սույն օրենքից, այլ օրենքներից եւ իրավական ակտերից:

Հոդված 6. Հրդեհային անվտանգության ապահովման մարմինների համակարգը

Հրդեհային անվտանգության ապահովման մարմինների համակարգն են կազմում պետական կառավարման եւ տեղական ինքնակառավարման մարմինները, կազմակերպությունները, որոնք մասնակցում են հրդեհային անվտանգության ապահովմանը` Հայաստանի Հանրապետության օրենսդրությամբ սահմանված կարգով:

Հոդված 7. Պետական կառավարումը հրդեհային անվտանգության ապահովման բնագավառում
Պետական հակահրդեհային ծառայությունն ընդգրկվում է ԱԻՎ համակարգի մեջ:

Հոդված 8. Հակահրդեհային նորմատիվ փաստաթղթերը
Հակահրդեհային նորմատիվ փաստաթղթերը (տեխնիկական կանոնակարգերը), ինչպես նաեւ հրդեհային անվտանգության պահանջները սահմանող ստանդարտները պարտադիր են բնակավայրերի, շենքերի եւ շինությունների նախագծման, կառուցման եւ շահագործման, հիմնանորոգման եւ վերակառուցման, ինչպես նաեւ սարքավորումների արտադրության եւ շահագործման ժամանակ:
Հրդեհային անվտանգության նորմատիվ փաստաթղթերը նախապես համաձայնեցվում են պետական հրդեհային հսկողության մարմինների հետ:
Հրդեհային անվտանգության նորմատիվ փաստաթղթերով չսահմանված` հրդեհային անվտանգության ապահովման առանձին լուծումներ պահանջող հարցերի վերաբերյալ եզրակացություններ է տալիս պետական հակահրդեհային ծառայությունը:

Հոդված 9. Հրդեհների կանխարգելման հանրապետական եւ տեղական ծրագրերը

Հրդեհների առաջացումը կանխարգելող եւ դրանց մարմանը նպաստող հանրապետական եւ տեղական նպատակային ծրագրերը մշակում ու իրականացնում են պետական կառավարման մարմինները` Հայաստանի Հանրապետության կառավարության լիազորած մարմնի (այսուհետ` լիազորված մարմին) ներկայացրած հակահրդեհային իրավիճակի վերլուծության արդյունքների եւ համապատասխան առաջարկությունների հիման վրա: Տեղական նպատակային ծրագրերը համաձայնեցվում են տեղական ինքնակառավարման մարմինների հետ:

Հոդված 10. Հրդեհների եւ դրանց հետեւանքների պետական հաշվառումը

Հրդեհների եւ դրանց հետեւանքների պետական միասնական հաշվառումը կատարում են պետական հրդեհային հսկողության մարմինները, այդ բնագավառում լիազորված մարմնի հետ համաձայնեցված` հրդեհների հաշվառման կանոններին համապատասխան:
Պետական կառավարման մարմինները եւ կազմակերպություններն իրենց ենթակա օբյեկտներում իրականացնում են հրդեհների վերաբերյալ հաշվառում: