Քաղպաշտպանության միջազգային կազմակերպության  (ՔՊՄԿ) գլխավոր քարտուղար Նավաֆ Ալ-Սլեյբիի ուղերձը` 2010 թ. մարտի 1-ին Քաղպաշտպանության միջազգային օրվա կապակցությամբ

Աղետների բժշկությունը մի առանձին ճյուղ է. դա արտակարգ արձագանքման բժշկություն է, երբ հաշվվում են րոպեները, բժշկական օգնությունը ցուցաբերվում է բարդ պայմաններում` հաշվի առնելով մշտական ռիսկը, երբ հիմնական բնութագրիչը տուժածների զանգվածային ու հանկարծակի հոսքն է` բժշկական տեսակավորման հավանականությամբ։

Այս տեսանկյունից, աղետների բժշկությունը նման է բժշկության այլ տեսակներին։

Նախեւառաջ, ռազմական բժշկությանը, քանի որ պատերազմը, ինչպես եւ արտակարգ իրավիճակը, մեծ թվով զոհերի պատճառ է դառնում։ Ընդհանուր գծեր կարելի է գտնել նաեւ անհապաղ բուժօգնության հետ, որտեղ հստակ միջոցների ու, իրադրությանը համապատասխան, բուժկանխարգելիչ միջոցառումների կիրառումը թույլ է տալիս բարենպաստ պայմաններ ստեղծել տուժածների հետագա տեղափոխման համար` հաջողության հասնելու առավելագույն հնարավորության պայմաններում վիրահատություններ անցկացնելու նպատակով։  Յուրաքանչյուր տուժածի ամենակարճ ժամանակահատվածում լավագույն բուժսանիտարային սպասարկում տրամադրելու համար «աղետների բժշկություն» հասկացության մեջ է մտնում ինչպես տիրապետումը բուժօգնության տեխնոլոգիաներին, այնպես էլ գործողությունների հստակ կազմակերպումն ու մարտավարությունը։ Իրոք, տուժածների մեծ թիվն անխուսափելիորեն նշանակում է նաեւ հետեւանքների վերացման մեծաթիվ մասնակիցներ (հրշեջ-փրկարարական խմբեր, քաղպաշտպանություն, ոստիկանություն, Կարմիր խաչ, դատական եւ վարչական կառավարման մարմիններ, սոցիալական ծառայությունները եւ այլն)։ Այդ ծառայությունների արդյունավետ  փոխգործության համար անհրաժեշտ է որոշել հիերարխիան, ապահովել նրանց գործունեության վերահսկողությունն ու կարգավորումը։ 

Այլ կերպ ասած, աղետների բժշկության միջոցառումների նպատակամղված նախապատրաստման անհրաժեշտությունն ակնհայտ է։ Իսկ համապատասխան գիտելիքներն այդ ոլորտում կարելի է ձեռք բերել միայն բարձր մակարդակի տեսական եւ գործնական պատրաստվածության շրջանակներում։ 

ՔՊՄԿ-ն, որի հիմնական խնդիրն է քաղպաշտպանության ոլորտում նախապատրաստման անցկացումը, գիտակցում է այդ անհրաժեշտությունը եւ ակտիվորեն աշխատում է այդ ուղղությամբ։ Արդեն մի քանի տարիների ընթացքում մեր կազմակերպությունը դասընթացներ է անցկացնում աղետների բժշկության վերաբերյալ, որոնց կարող են մասնակցել մեր անդամ-երկրների քաղպաշտպանության ծառայությունների բժիշկներն ու բժշկական աշխատողները։ 2010թ. այդ աշխատանքը շարունակվելու է, քանի որ ծրագրում հիմա երկու դասընթաց է ներառվել այդ թեմայով։

Քաղպաշտպանության միջազգային օրվա կապակցությամբ ՔՊՄԿ-ն կրկին հայտարարում է միջազգային ու ազգային մակարդակներում ցանկացած նախաձեռնությանն իր աջակցության մասին, որոնք մասնագետների առավել մեծ թվի թույլ կտան բարելավել իրենց գիտելիքները, որպեսզի նրանք հնարավորություն ստանան լավագույն կերպով դիմակայելու արտակարգ իրավիճակներին` տիրապետելով անհրաժեշտ գիտելիքների ու փորձի։

2010 թ. Քաղպաշտպանության միջազգային օրը ՔՊՄԿ-ի համար հիանալի հնարավորություն է` շնորհակալություն հայտնելու առողջապահության աշխատակիցներին, որոնք կյանքեր են փրկում եւ պաշտպանում բնակչության առողջությունն ինչպես բնական, այնպես էլ տեխնածին աղետների ժամանակ։