Դեկտեմբերի 16-17-ը «Անի Պլազա» հյուրանոցում տեղի ունեցավ բարձր մակարդակի եռակողմ հանդիպում` նվիրված «Հայաստանում բնակչության պաշտպանության հնարավորությունների զարգացում» հայ-շվեդ-էստոնական եռամյա ծրագրի ամփոփմանն ու հետագա պլաններին։

Ծրագրի նախագիծը մշակվել է 2005 թ. հուլիսին` Երեւանում կայացած աշխատանքային հանդիպման ժամանակ։ Ծրագրի հիմնական նպատակն էր` Հայաստանի Հանրապետության բնակչության պաշտպանության  համակարգի արդյունավետության բարելավումը։

Ծրագիրն իրականացվել է հետեւյալ ուղղություններով ` տեղական ռիսկերի գնահատում, աշխատանք երեխաների եւ երիտասարդության հետ, կապի համակարգի եւ դիսպետչերական կենտրոնի զարգացում, ուսուցման մեթոդիկայի ու սարքավորումների զարգացում եւ օպերատիվ ծառայության օպտիմալացում։ Դրա շրջանակներում 2007-2009 թթ. իրականացվել է շուրջ 30 միջոցառում։ Ծրագրի արդյունքներն` ըստ ուղղությունների, հետեւյալն են. 1) Տավուշի մարզում ստեղծվել է 4 «Apell» խումբ, որոնց կողմից կատարվել է մարզի շրջանների` նոր մեթոդով ռիսկերի գնահատում։ Մշակվել են «Տարածաշրջանի (համայնքի) ռիսկի կառավարման պլան»-ներ եւ գործնականորեն` վարժանքների անցկացմամբ ստուգվել է այդ պլանների իրատեսությունը, 2) Պատրաստվել են երեխաների եւ երիտասարդության դասավանդման ուսումնական մեթոդոլոգիաներ ու նյութեր, ուսումնասիրվել է Էստոնիայի պատանի փրկարարների ճամբարների ստեղծման փորձը, Հայաստանում ձեւավորվել են նմանատիպ ճամբարի ստեղծման նախադրյալներ, 3) Մշակվել է Հայաստանի փրկարար ծառայության ճգնաժամային կառավարման կենտրոնի նոր կառուցվածք` իր կանոնադրությամբ, աշխատակիցների խնդիրներով ու պարտականություններով, ուժերի եւ միջոցների հաշվարկով, մշակվել է դիսպետչերական կենտրոնի գծային եւ ռադիոկապի կազմակերպման ուրվագիծ, 4) Կազմակերպվել եւ անց են կացվել Հայաստանի փրկարար ծառայության հրշեջ եւ փրկարարական ծառայողների ընդհանուր մասնագիտական ուսուցման դասընթացներ, որոնց մասնակցել է մոտ 600 ծառայող։ Դասընթացների թեմաներն ընդգրկվել են Ճգնաժամային կառավարման ակադեմիայի ուսումնական ծրագրերում։ Ձեռք են բերվել` մեկ միավոր հրշեջ-փրկարարական ավտոմեքենա, երեք լրակազմ հիդրավլիկ փրկարարական գործիքներ, 120 մարտական հագուստի լրակազմ, 15 շնչառական ապարատ, հրշեջ-փրկարարական այլ գույք եւ սարքավորումներ, կառուցվել է մեկ ջերմախցիկ։