Հաջողվել է փրկել
Օգոստոսի 20-ին, ժամը 18.30-ի սահմաններում Սեւանի “Խոլոդոկ” լողափում հերթապահության ժամանակ ջրափրկարարները ջրում խեղդվող տղամարդ են նկատել:
Րոպեներ անց ջրափրկարարները լճից դուրս են բերել Վանաձոր քաղաքի բնակիչ, 1980 թ. ծնված Հովիկ Ղուկասյանին: Փրկարարները տուժածին ցուցաբերել են առաջին բուժօգնություն եւ տեղափոխել Սեւանի հիվանդանոց:
Ըստ բժիշկների` տուժածի վիճակը բավարար է:

Ջրահեղձում
Օգոստոսի 20-ին, ժամը 17.23-ին ահազանգ է ստացվել, որ Սեւանի “Ջրահարս” լողափում` ափից 100 մ հեռավորության վրա, դատարկ ռետինե նավակ է հայտնաբերվել:
Մոտորանավակով դեպքի վայր է մեկնել հատուկ ջրափրկարարական ջոկատի օպերատիվ խումբը:
Ափից 7-8 մ հեռավորության վրա ջրափրկարարները հայտնաբերել ու ջրից դուրս են բերել Սեւանի Ցամաքաբերդ թաղամասի բնակիչ, 1951 թ. ծնված Բենիկ Մարտիրոսյանի դին եւ հանձնել ոստիկանության աշխատակիցներին:

Օգնում են փրկարարները
Օգոստոսի 20-ին, ժամը 14.40-ին ահազանգ է ստացվել, որ Ծովագյուղ գյուղի մերձակայքում մի ավտոմեքենա դուրս է եկել ճանապարհի երթեւեկելի մասից եւ սահելով հասել Սեւանա լճի ափ:
Դեպքի վայր մեկնած ջրափրկարարները “Իսուզու” մակնիշի առանց պետհամարանիշի ավտոմեքենան դուրս են բերել ճանապարհի երթեւեկելի մաս:
Զոհեր եւ տուժածներ չկան:

Հրդեհ գոմում
Օգոստոսի 18-ին, ժամը 13.50-ին ահազանգ է ստացվել, որ հրդեհ է բռնկվել Գեղարքունիքի մարզի Խաչաղբյուր գյուղում:
Դեպքի վայր է մեկնել մեկ մարտական հաշվարկ: Հրդեհը մեկուսացվել է ժամը 14.25-ին, մարվել` 17.15-ին:
Գ. Մկրտչյանին պատկանող տան բակում այրվել է 300 հակ անասնակեր, ինչպես նաեւ գոմի ու հացատան ծածկերը` 20 քմ ընդհանուր մակերեսով:

Հրդեհ տնակում
Օգոստոսի 17-ին, ժամը 07.47-ին ահազանգ է ստացվել, որ հրդեհ է բռնկվել Գեղարքունիքի մարզի Արտանիշ գյուղում։ Հրդեհի հետեւանքով ամբողջությամբ այրվել է Գ. Վասիլյանին պատկանող` 48 քմ մակերեսով տնակը։

Այրվել է տանիք
Օգոստոսի 14-ին, ժամը 02.17-ին Գեղարքունիքի մարզի Ձորագյուղի գյուղապետից ահազանգ է ստացվել, որ գյուղում տուն է այրվում։ Հրդեհի հետեւանքով այրվել է  Հարությունյանի տան տանիքը` 250 քմ մակերեսով, այնտեղ կուտակված 500 հակ խոտ, 12 անվադող, ինչպես նաեւ ավտոմեքենայի պահեստամասեր, տնտեսական եւ կենցաղային իրեր։

Բախվել են մեքենաներ
Օգոստոսի 13-ին, ժամը 20.38-ին ահազանգ է ստացվել, որ Գավառ-Սեւան ավտոճանապարհի 5-րդ կմ-ում տեղի է ունեցել ավտոպատահար եւ անհրաժեշտ է փրկարարների օգնությունը։
Դեռեւս չպարզված հանգամանքներում բախվել են Գավառ-Երեւան երթուղու “Գազել” մակնիշի 3208 Լ եւ “ՎԱԶ-2106” մակնիշի 65 ԼՕ 786 պետհամարանիշերի ավտոմեքենաները։
Դեպքի վայր է մեկնել մարզային փրկարար ջոկատը։
Փրկարարների ուժերով “ՎԱԶ-2106” մակնիշի ավտոմեքենայից տարբեր մարմնական վնասվածքներով դուրս է բերվել վարորդ` Հայրավանք գյուղի բնակիչ Պարգեւ Հակոբյանը, որը տեղափոխվել է Գավառի հիվանդանոց։ Նույն հիվանդանոց է տեղափոխվել նաեւ “Գազել” մակնիշի ավտոմեքենայի ուղեւոր Աշոտ Սարգսյանը, որն առաջին  բուժօգնություն ստանալով` դուրս է գրվել։

Այրվել է անասնակեր
Օգոստոսի 13-ին, ժամը 13.36-ին ահազանգ է ստացվել, որ հրդեհ է բռնկվել Գեղարքունիքի մարզի Գավառ քաղաքում։ Հրդեհի հետեւանքով Ա. Խաչատրյանի տան բակում այրվել է 1 տոննա պահեստավորած անասնակեր։