Արջերը ելել են որսի
Արագածոտնի մարզի Աղձք համայնքից տեղեկություն է ստացվել, որ օգոստոսի 17-ին եւ 18-ին արջերը հարձակվել են համայնքի սարերում պահվող հորթերի վրա ու հոշոտել նույն գյուղի բնակիչներ Ֆ. Գասպարյանին եւ Ս. Գասպարյանին պատկանող 3 հորթ:

Շրջվել է մեքենա
Օգոստոսի 17-ին Արագածոտնի մարզից հայտնել են, որ ժամը 11.00-ի սահմաններում Ապարան-Աշտարակ ավտոճանապարհի 40-րդ կմ-ում տեղի է ունեցել ավտոպատահար։
Դեռեւս չպարզված հանգամանքներում “Ֆորդ տրանզիտ” մակնիշի 774 ՍԼ 27 պետհամարանիշի ավտոմեքենան դուրս է եկել ճանապարհի երթեւեկելի մասից ու շրջվել։
Պատահարի հետեւանքով մեքենայի վարորդը` Կարբի գյուղի բնակիչ, 1966 թ. ծնված Այվան Շահբազյանը ստացել է տարբեր մարմնական վնասվածքներ ու տեղափոխվել Աշտարակի հիվանդանոց, որտեղ եւ մահացել է։

Այրվել է անասնակեր
Օգոստոսի 12-ին, ժամը 10.11-ին ահազանգ է ստացվել, որ հրդեհ է բռնկվել Արագածոտնի մարզի Սասունիկ գյուղում։
Դեպքի վայր է մեկնել երկու մարտական հաշվարկ։ Հրդեհը մեկուսացվել է ժամը 11.05-ին, մարվել` 11.36-ին։
Ա. Մինասյանին պատկանող տան բակում այրվել է 1 տոննա պահեստավորված անասնակեր եւ օժանդակ շինության տանիքը` 4 քմ մակերեսով։

Մեքենան բախվել է էլեկտրասյանը
Օգոստոսի 12-ին, ժամը 08.30-ին ահազանգ է ստացվել, որ Աշտարակ-Ապարան ավտոճանապարհի 14-րդ կիլոմետրում` Արտաշավան գյուղի մոտ, տեղի է ունեցել ավտոպատահար։
Դեպքի վայր է մեկնել մարզային փրկարարական ջոկատը։
Պարզվել է, որ Ֆոլքսվագենե մակնիշի 20 ՏՕ 602 պետհամարանիշի ավտոմեքենան բախվել է բարձր լարման էլեկտրասյանը եւ շրջվել, ինչի հետեւանքով մեքենայի վարորդը եւ ուղեւորը` Աշտարակի բնակիչներ, 1977 թ. ծնված Սամվել Սարգսյանն ու 1976 թ. ծնված Անժելա Խաչատրյանը տեղում մահացել են։
Փրկարարները դիակները դուրս են բերել ավտոմեքենայից։

Այրվել է անասնակեր
Օգոստոսի 10-ին, ժամը 14.22-ին ահազանգ է ստացվել, որ հրդեհ է բռնկվել Արագածոտնի մարզի Արեգ գյուղում։
Դեպքի վայր է մեկնել երկու մարտական հաշվարկ։ Հրդեհը մեկուսացվել է ժամը 14.50-ին, մարվել` 20.50-ին։
Այրվել է Կ. Մաթեւոսյանին պատկանող տան բակում պահեստավորված 1950 հակ անասնակեր։

Այրվել է պահեստավորված խոտ
Օգոստոսի 9-ին, ժամը 12.48-ին ահազանգ է ստացվել, որ հրդեհ է բռնկվել Արագածոտնի մարզի Նոր Եդեսիա գյուղում։
Դեպքի վայր է մեկնել մեկ մարտական հաշվարկ եւ մեկ ջրատար։ Հրդեհը մեկուսացվել է ժամը 15.46-ին, մարվել` 16.30-ին։
Տ. Մստոյանի տան բակում այրվել է 350 հակ խոտ։

Օձի խայթոց
Արագածոտնի մարզից հայտնել են, որ օգոստոսի 8-ին, ժամը 22.50-ին անհայտ տեսակի օձի խայթոցով Աշտարակի հիվանդանոց է տեղափոխվել Ուջան գյուղի բնակչուհի` 1967 թ. ծնված Մարիամ Կիրակոսյանը:
Բժիշկների գնահատմամբ` տուժածի վիճակը բավարար է:

Պայթյուն` բախումից
Օգոստոսի 8-ին, ժամը 19.54-ին ոստիկանությունից ահազանգ է ստացվել, որ գազի պայթյունի հետեւանքով հրդեհ է բռնկվել Արագածոտնի մարզի Կարբի գյուղում:
Դեպքի վայր է մեկնել մեկ մարտական հաշվարկ:
Տեղում վայրում պարզվել է, որ խոտով բարձած բեռնատար ավտոմեքենան հարվածել է միջին ճնշման գազատար խողովակին, ինչի հետեւանքով առաջացել է պայթյուն` առանց հրդեհի:
Պայթյունի հետեւանքով վնասվել 100 մ երկարությամբ գազի խողովակ: