ՔՊ գնդի, ԱԱՓՋ-ի փրկարարներին անհրաժեշտ սարքավորումներով, կապի եւ տրանսպորտային միջոցներով հանդերձավորելուն մասնակցել են Շվեդիայի թագավորական փրկարարական ծառայությունը եւ Գերմանիայի փրկարարական ծառայությունը:

Իրենց մասնագիտական վարպետությունը բարձրացնելու նպատակով Հայաստանի փրկարարները հատուկ պատրաստության տեսական ու գործնական դասընթացներ են անցել Շվեդիայում, Գերմանիայում, Ֆրանսիայում, Ռուսաստանի Դաշնությունում, ինչպես նաեւ ՀՀ ԱԻՎ ճգնաժամային կառավարման ինստիտուտում:

1998թ. ՀՀ ԱԻՎ մի քանի սպաներ ուսանելու ուղարկվեցին Ռուսաստանի արտակարգ իրավիճակների նախարարության քաղաքացիական պաշտպանության ակադեմիա: Համապետական նշանակության խնդիր է եւ մեծ ուշադրություն է պահանջում պաշտպանության, անվտանգության միջոցները բնակչությանը ուսուցանելը, նրան արտակարգ իրավիճակներում գործելուն նախապատրաստելը: Թեպետ փաստ է, որ խոշոր աղետի, վթարի դեպքում բնակչությանը պաշտպանելը, նրա անվտանգությունն ապահովելը պետության պարտականությունն է, այդուհանդերձ, չմոռանանք` լիարժեք պաշտպանվածությունը մեծապես պայմանավորված է յուրաքանչյուր քաղաքացու գիտակցական վերաբերմունքից, ինքն իրեն պաշտպանելու պատասխանատվությունից ու կարողությունից: Ամեն ոք չպետք է մոռանա, որ քաղպաշտպանությունը նաեւ իր պարտականությունն է: Բանն այն է, որ կարող ենք ունենալ ամենակատարյալ տեխնիկայով հանդերձավորված փրկարարական կազմավորումներ, բայց եթե բնակչությանը` փոքրից մինչեւ տարեց, պատշաճորեն չպատրաստենք, ապա աղետների դեպքում կորուստները մեծ կլինեն:

Մինչեւ 80-ական թվականների վերջը Հայաստանում գործում էր բնակչության քաղպաշտպանության ուսուցման մի համակարգ, որտեղ հիմնական ուշադրությունը բեւեռված էր պատերազմական ժամանակ, մասնավորապես, զանգվածային ոչնչացման զենքից բնակչության պաշտպանվելու հարցերի վրա: Սակայն Սպիտակի երկրաշարժը, դրան հաջորդած մի շարք այլ աղետներ ու խոշոր վթարներ ցույց տվեցին, որ հանրապետության բնակչությանն անհրաժեշտ է ամենից առաջ ուսուցանել խաղաղ ժամանակ արտակարգ իրավիճակներում գործելու հմտությունները: Այս հանգամանքն էլ պահանջեց կազմել ուսուցման նոր ծրագրեր, նոր մոտեցումներ ցուցաբերել ուսումնական գործընթացի մեթոդաբանական եւ տեխնիկական ապահովմանը, ուսումնանյութական բազայի ամրապնդմանն ու զարգացմանը:

«ՀՀ արտակարգ իրավիճակների պետական վարչության նյութական բազայի եւ արտակարգ իրավիճակներում գործելու մասնագետների վերապատրաստման ինստիտուտի ստեղծման մասին» ՀՀ կառավարության 1992թ. հունվարի 31-ի թիվ 74 որոշմամբ փաստորեն դրվեց այն օջախի հիմքը, որը սկսեց իրականացնել վերը նշված խնդիրները:

Բնակչության պատրաստման համակարգի կատարելագործման գործում հաջորդ կարեւոր քայլը դարձավ ՀՀ կառավարության «Արտակարգ իրավիճակների հիմնահարցերով ուսուցման կազմակերպման բարելավման մասին» 1994թ. հուլիսի 7-ի թիվ 296 որոշումը: Վերջինս արտակարգ իրավիճակների հիմնահարցերով զանգվածային ուսուցման բազային կազմակերպության հաստատվեց ԱԻ վարչությանն առընթեր կադրերի վերապատրաստման ինստիտուտը (ներկայումս` Ճգնաժամային կառավարման պետական ակադեմիա):

1. բնակչության նախապատրաստումը արտակարգ իրավիճակներին եւ այդ իրավիճակներում գործելու հմտությունների ուսուցումը,
2. արտակարգ իրավիճակներում գործողությունների պլանավորման, օպերատիվ հակազդման, ճգնաժամային կառավարման պատասխանատու կադրերի վերապատրաստումը եւ որակավորման բարձրացումը,
3. արտակարգ իրավիճակներում ազգային էկոնամիկայի կայունության, մոբիլիզացիոն պատրաստվածության, էկոնոմիկայի խոցելիության նվազեցման հարցերով համապատասխան կադրերի վերապատրաստումը եւ որակավորման բարձրացումը,
4. արտակարգ իրավիճակների կանխման ու վերացման, արտակարգ իրավիճակներում գործելու եւ բնակչության պաշտպանության ու կենսաապահովման հարցերով կադրերի պատրաստումը, վերապատրաստումը եւ որակավորման բարձրացումը,
5. փրկարար-մասնագետ կադրերի պատրաստումը եւ որակավորման բարձրացումը:
Այս ոլորտում իրականացվող աշխատանքները հստակեցնելու առումով կարեւոր նշանակություն ունեցավ ՀՀ կառավարության «Արտակարգ իրավիճակներին դիմակայելու հարցերով ուսուցում կազմակերպելու կարգը հաստատելու մասին» 1995թ. մարտի 7-ի թիվ 125 որոշումը:
Մեծ ուշադրություն է դարձվում Հայաստանի ապագա քաղաքացիներին` սովորող երիտասարդությանը, արտակարգ իրավիճակներում գործելու նախապատրաստմանը: Բանն այն է, որ մինչեւ վերջերս հանրակրթական դպրոցներում դասավանդվող «Քաղաքացիական պաշտպանություն» առարկան չէր բովանդակում արտակարգ իրավիճակների ժամանակ սովորող երիտասարդության գործելուն վերաբերող անհրաժեշտ ծավալի գիտելիքներ: ՈՒստի խնդրի լուծման հարցում բեկումնային էր ՀՀ կառավարության Հայաստանի Հանրապետության կրթական համակարգում «Քաղաքացիական պաշտպանության եւ արտակարգ իրավիճակների հիմնահարցեր» առարկայի ուսուցման կազմակերպման մասին՚` 1996թ. սեպտեմբերի 27-ի թիվ 320 որոշումը:
Այսպիսով, 1996-97 ուսումնական տարվանից «Քաղաքացիական պաշտպանություն» առարկան վերանվանվեց «Քաղաքացիական պաշտպանության եւ արտակարգ իրավիճակների հիմնահարցեր» եւ համապատասխան ժամաքանակներով մտցվեց բոլոր ուսումնական պլանների մեջ: Որոշումով սահմանվեց, որ ուսումնական ծրագրերը հաստատվում եւ դրանցում փոփոխությունները կատարվում են ՀՀ արտակարգ իրավիճակների վարչության համաձայնությամբ:

Ճգնաժամային կառավարման պետական ակադեմիայի ուսումնական ծրագրում առանձնահատուկ տեղ է հատկացվել պետական կառավարման հանրապետական մարմինների եւ տեղական ինքնակառավարման մարմինների ղեկավարներին ու մասնագետներին ԱԻ-ում ճգնաժամային կառավարման վերաբերյալ տեսական ու գործնական գիտելիքների հաղորդմանը:

Մեր հանրապետության անկախության հռչակմամբ սկզբնավորվեց ՀՀ ինքնուրույն արտաքին քաղաքականությունը, դրվեց աշխարհի տարբեր երկրների հետ նրա բազմաբնույթ առնչությունների, համագործակցության հիմնաքարը: ՈՒշագրավն ու նորն այն է, որ այսօր Հայաստանի արտաքին կապերն իրականացվում են ոչ միայն կառավարության, իշխանության բարձրագույն մարմինների մակարդակով, այլեւ` գիտական, մշակութային, ուսումնական հաստատությունների, արտադրական ձեռնարկությունների, նախարարությունների եւ այլ կազմակերպությունների:
ԱԻՎ-ի աշխատանքում արտաքին կապեր հաստատելու գլխավոր ազդակը արտասահմանի զարգացած պետությունների` արտակարգ իրավիճակներում գործելու, դրանք կանխելու, բնակչության անվտանգությունն ապահովելու, ինչպես նաեւ փրկարարներ պատրաստելու ասպարեզներում կուտակած փորձն ուսումնասիրելն ու տեխնիկական սարքավորումներին ծանոթանալն էր, այդ ամենը Հայաստանում ներդնելը եւ այլն: