Փետրվարի 8-12-ը  Կոտայքի, Արագածոտնի ու Արմավիրի հրշեջներն  «Արտակարգ ալիք»  ուսումնական կենտրոնում էին։ Այս անգամ Շվեյցարիայի զարգացման գործակալության «Հրշեջները համայնքներում» ծրագրի շրջանակներում կազմակերպված դասընթացին մասնակցելու նրանց հերթն էր։

Մինչ «Հրշեջները համայնքներում» ծրագիրը Շվեյցարիայի զարգացման գործակալությունն իրականացրել է  «Արձագանք» ծրագիրը, որի շրջանակներում Հայաստանի 48 հրշեջ-մասերում ուսուցում են անցել հրահանգիչները, ովքեր հետագայում իրենց գիտելիքները փոխանցել են անձնակազմերին։ «Արձագանքի» շրջանակներում հրշեջ մասերին տրամադրվել են նաեւ փրկարարական ժամանակակից գործիքներ ու սարքավորումներ։

Հաջողությամբ ավարտված «Արձագանքին» հաջորդել է Հրշեջները համայնքներում ծրագիրը, որի  մեխն արդեն հանրային իրազեկումն է։ «Արտակարգ ալիք» լրատվական կենտրոնում հրշեջները սովորում են, թե ինչպես է պետք կազմակերպել լրատվությունն արտակարգ իրավիճակներում, աշխատել լրատվամիջոցների ու բնակչության հետ։
Բոլոր մարզերն արդեն հասցրել են մասնակցել ծրագրին, վերջին եռյակը Կոտայք-Արագածոտն-Արմավիրն էր, մնաց էլ է միայն Երեւանը։

Այս անգամ էլ պարապմունքները եւ՛ տեսական էին, եւ՛ գործնական. գրվեցին արտակարգ իրավիճակների սցենարներ, տեղի ունեցան մամուլի խաղարկային  ասուլիսներ։ Արագածոտնի եւ Արմավիրի մարզերի հրշեջների սցենարը հրդեհային էր, մեկը տեղի էր ունեցել թեփի պահեստում, մյուսը` Արայի լեռան լանջին։ Կոտայքի մարզը նախընտրել էր ջրամբարի փլուզումը։ Երեք խաղարկային ասուլիսների շնորհիվ հրշեջների համար առավել պարզ դարձավ, թե ինչպես են արտակարգ իրավիճակի մասին տեղեկատվություն հաղորդում, շփվում  լրագրողների հետ, պատասխանում տեղին ու անտեղի հարցերի։ 

Դասընթացից հետո հրշեջները նույնպես շատ անելիք ունեն։ Նրանց աչքի առաջ արդեն օրինակներ կան. իրենց գործընկերների` համայնքներում կատարած արդյունավետ աշխատանքերն են։ Օրինակ Լոռու եւ Սյունիքի մարզերում հրշեջների տարած բացատրական աշխատանքների ու իրազեկման շնորհիվ բնակչությունը սկսել է գետերի հուները մաքրել, սողանքը կանխարգելելու նպատակով ծառատունկ կատարել, դպրոցներում ուսումնական տարահանումներ իրականացնել, մի խոսքով` ապրել ու գործել իրազեկված մարդու պես։ Նույն պատկերն է նաեւ Հայաստանի մյուս մարզերում։

Իսկ դասընթացի ավարտի վկայականները հրշեջներն այս անգամ ստացան Շվեյցարիայի դեսպանատան ղեկավար Կոնստանտին Օբոլենսկուց ու ՀՀ ԱԻՆ ՀՓԾ փրկարար ուժերի վարչության պետ Վաչիկ Նիկողոսյանից։

Ավանդույթի համաձայն` «Արտակարգ ալիք» հյուր եկած դեսպանը մաղթանքներ գրեց ու ստորագրեց բոյաչափի վրա, շրջեց տարածքում ու ծանոթացավ կենտրոնի աշխատանքներին։ Նա նշեց, որ մշակված բոլոր նյութերը` պաստառները, բրոշյուրները, հոլովակները, ստեղծագործական մոտեցման արդյունք են։ Դեսպանը նույնպես ընդգծեց հանրային իրազեկման կարեւորությունը` աղետների կառավարման ոլորտում եւ բարձր գնահատեց կենտրոնի ներդրումն այս ոլորտում։

Կոտայքի, Արմավիրի ու Արագածոտնի հրշեջները տուն վերադարձան արտակարգ իրավիճակների մասին խորհրդատվական, ուսուցողական ու ճանաչողական նյութերով, որոնք ավելի կհեշտացնեն նրանց առաքելությունը` իրազեկել իրենց համայնքերին։